Madison Marsh Umukobwa w’imyaka 22 usanzwe ari umusirikare urwanira mu kirere akaba afite ipeti rya “sous lieutenant”, yegukanye ikamba yegukanye ikamba rya Miss Amerika. Akaba yaritabiriye iri rushanwa ry’ubwiza agaharariye Leta ya Colorado. Yahigitse abakobwa 50 bahagarariye Leta 50 zose zigize Amerika ndetse n’undi umwe uhagarariye ‘District ya Columbia’.
Umuvugizi wa Air Force Academy, yatangaje ko Marsh abaye umusirikare wa mbere wo mu rwego rw’abasirikare bakuru (officier) ukiri mu gisirikare, ugiye mu marushanwa ya Miss America.
Uretse kuba ari umusirikare mu gisirikare kirwanira mu kirere, Marsh afite n’impamyabushobozi yo mu rwego rwa Masters muri Politiki yakuye mu Ishuri rya Harvard Kennedy School.
News-24.fr dukesha iyi nkuru, yatangaje ko mu gihe yari akiri mu ishuri rya gisirikare rya Leta Zunze Ubumwe za Amerika ryigisha ibijyanye n’igisirikare kirwanira mu kirere, ari bwo yagaragaje ko ashaka kuzitabira irushanwa ry’ubwiza.
Aganira n’ikinyamakuru ‘Harvard Crimson’ mu ntangiriro z’uku kwezi kwa Mutarama 2024, Madison Marsh, yavuze ko hari ibintu byinshi igisirikare gihuriyeho n’irushanwa rya Miss Amerika.
Yagize ati, “Iyo nambaye impuzankano ya gisirikare, mba nkorera kandi mpagarariye igihugu cyacu, kandi n’iyo nambaye ikamba ba Miss bambara, mba nkorera kandi mpagarariye sosiyete”.
Miss Madison Marsh ari mu bashinze umuryango wa “Whitney Marsh Foundation”, ugamije gutera inkunga ubushakashatsi kuri kanseri y’impindura.
Miss Madison Marsh yari yaratorewe kuba Miss Colorado muri Gicurasi 2023, mbere yo kwegukana ikamba rya Miss Amerika.
INKURU YANDITSWE NA KAYITESI Ange
